Dende a Comunidade de Montes de Tameiga - Sala Rebullón, organizamos estes concertos solidarios co obxectivo de recadar fondos en apoio á loita contra o proxecto de Altri en Palas de Rei.
En Tameiga coñecemos ben o que é loitar contra proxectos que atentan contra o noso patrimonio natural, xa que seguimos resistindo contra o proxecto GS360 que a familia Mouriño, co apoio da Xunta de Galicia, pretende levar a cabo no noso monte comunal. A causa é tamén a nosa, e por iso queremos amosar toda a nosa solidariedade e apoio a Plataforma Ulloa Viva
As bandas confirmadas son Ruxe Ruxe, Tiam Gz, Flow do Toxo, Willow GHZ, Sun Iou e O Leo de Matamá.
Deste xeito, a nosa veciñanza poderá coñecer de primeira man o grave atentado ambiental que suporía a execución do proxecto de Altri, que afectaría ao Río Ulla, á Ría de Arousa e, por extensión, a toda Galiza. Xa que o eucalipto, unha verdadeira praga nos nosos montes, veríase aínda máis favorecido coa instalación desta planta, agravando o problema.
